Nú er að fara af stað námskeið fyrir félagsmenn SÍ um störf matsmanna fyrir dómskerfið og barnaverndarnefndir.
Stjórn SÍ vill minna á að matsvinna sem þessi felur í sér mjög sérhæfð vinnubrögð og um leið er lögð mikil ábyrgð á hendur sálfræðinga sem vinna hér að velferð og framtíð þeirra barna sem um ræðir. Niðurstöður í forsjár- og barnaverndarmáluml eru oft aðrar en væntingar foreldra og ekki óalgengt að ósætti þeirra leiði til gagnrýni á matsmenn og vinnubrögð þeirra. Því er brýnt að vanda vel til verka og tileinka sér vinnubrögð sem best eru. Á undanförnum 25 árum hafa sálfræðingar á Íslandi haldið reglulega ítarleg námskeið fyrir matsmenn bæði með erlendum og innlendum kennurum og skapast hefur sterk hefð um vinnslu þessara mála.
Því ber að fagna að enn á ný sé haldið ítarlegt námskeið undir leiðsögn reyndra matsmanna, sálfræðinga, dómara og lögmanna og eru félagsmenn sem áhuga hafa á að taka að sér matsgerðir á þessum vettvangi hvattir til þátttöku.
